Artejanat Val Badia: la forza nöia dl artejanat ladin

L’artejanat é dagnora sté n setur economich important por la Val Badia y se liëia dër ala cultura y ala tradiziun ladina. Tistleri, zumpradus, moleri y depenjadus, tesceri y tröc d’atri mistiers d’artejan á arjunt liví dër alc da n punt d’odüda tecnich y artistich. Le proiet „Artejanat Val Badia (AVB)“ é gnü invié ia por promöie y valorisé le patrimone dla cultura dl artejanat ladin.

La strategia ideala por realisé chësc obietif é stada chëra da cherié na rëi flessibla de colaboraziuns danter les dites d’artejan dla Val Badia. Do na pröma fasa da chirí adöm les dites interessades, á l’Artejanat Val Badia cherié na rëi sterscia de dites d’artejan, autonomes mo tl medemo tëmp coliades. Le proiet dess daidé les dites che fej para da deventé plü competitives, svilupan idees nöies y sostignin la formaziun te deplü ciamps. Dilan al’„inteliënza de rëi“, che vëgn a s’al dé da partí les competënzes y spezialisaziuns, pó la produziun rové sön liví tres plü alc de cualité, aumentan la capazité da afronté n marcé tres plü globalisé.

Por evidenzié chësc conzet de cualité él gnü cherié n „quality brand“, na marca che AVB presentëia te sües campagnes de reclam, tres le „guerrilla“ y l’„influencer marketing“ o ince te botëghes temporanes, söi marciá y en ocajiun de manifestaziuns desvalies. I „social network“, na plata internet y „newsletter“ informatives completëia la strategia mirada de comunicaziun, che daidará stimolé, informé, trá ite, fá ciaré ca y mantigní vi le gran patrimone artejanal y cultural ladin.